Íbúar Lampedúsu gerðu hróp að Barosso og Letta

Íbúar ítölsku eyjunnar Lampedúsu gerðu hróp að José Manuel Barosso, forseta framkvæmdastjórnar Evrópusambandsins og Enrico Letta, forsætisráðherra Ítalíu, þar sem þeir heimsóttu eyjuna í morgun.

Barosso og Letta voru á Lampedúsu til að kynna sér aðstæður við leit að fleiri fórnarlömbum sjóslyssins í síðustu viku sem kostaði að minnsta kosti 275 flóttamenn lífið. Þrátt fyrir að Barosso tilkynnti um 30 milljóna evra aukafarmlag úr sjóðum ESB til að eiga við flóttamannastrauminn sem berst til eyjunnar ár hvert, viðraði hópur íbúa gremju sína við þá með skammarköllum.

Lampedúsa er aðeins 113 kílómetra frá ströndum Túnis og syðsti útvörður Ítalíu og ESB. Íbúar eyjunnar, sem eru aðeins um 6.000 talsins, hafa um árabil kvartað undan sinnuleysi Ítalskra stjórnvalda, yfirstjórnar ESB og annarra aðildarríkja sambandsins við að kljást við þær þúsundir flóttamanna sem koma að ströndum Lampedúsu ár hvert í von um að fá dvalarleyfi og ferðast frjálsir um alla Evrópu.

Innanríkisráðherrar ESB-ríkja hittust á fundi í gær þar sem samkomulag náðist um eflingu eftirlits og björgunarstarfs á Miðjarðarhafi.