Reykingabann fyrirhugað í breskum fangelsum

Reykingabann er í bígerð í öllum fangelsum Englands og Wales. Föngum verður óheimilt að reykja í öllum hlutum fangelsanna, þar á meðal á útisvæðum, og munu breytingarnar taka gildi á 12 mánaða tímabili sem hefst á næsta ári. Föngum verða boðnir nikótínplástrar til að hjálpa þeim að aðlagast banninu.

Rannsóknir sýna að um 80 prósent fanga í Englandi og Wales, sem eru rúmlega 84 þúsund talsins, reykja og er algengt að tóbak sé notað sem gjaldmiðill í fangelsunum. Í sumum fangelsum er föngum refsað fyrir slæma hegðun með reykingabanni en fyrirhugað bann er talið geta valdið reiði meðal annarra fanga sem hegða sér vel. Jafnvel er óttast að uppþot geti orðið í kjölfar bannsins.

Bannið á rætur sínar að rekja til kvartana frá fangavörðum og öðru starfsfólki undan óbeinum reykingum og einnig er óttast að fangelsisyfirvöld gætu verið skaðabótaskyld gagnvart starfsfólki sem hlotið hefur skaða af.

Steve Gillan, aðalritari sambands fangelsisstarfsmanna, tekur banninu fagnandi en segir að því gætu fylgt ýmis vandamál. „En þetta hefur tekist ágætlega í Kanada og á betrunarstofnunum fyrir unglinga í Englandi og Wales,“ bætir hann við í samtali sínu við The Times.