Lyftingar óléttrar konu valda fjaðrafoki

Lea-Ann Ellison, 35 ára verðandi móðir í Los Angeles, setti allt á annan endann þegar hún birti mynd af sér að lyfta lóðum á Facebook-síðu áhugafólks um Crossfit. Ellison, sem er vaxtarræktarkona, er komin átta og hálfan mánuð á leið og hafa rúmlega 16 þúsund athugasemdir verið settar við ljósmyndina á einungis fimm dögum.

Sumir lýsa yfir ánægju sinni á meðan aðrir gagnrýna Ellison harðlega. „Þetta er viðbjóðslegt,“ segir í einni athugasemdinni. Annar lýsir áhyggjum sínum og segir það stórhættulegt fyrir óléttar konur að lyfta þungu vegna þess að það geti rifnað gat á fylgjuna og valdið fósturláti. „Það er mjög eigingjarnt af henni að leggja líf barnsins í hættu við það að reyna að ná markmiðum sínum,“ skrifar sá þriðji.

Aðrir verja Ellison og hvetja hana. „Þetta er betra en óléttir offitusjúklingar með háþrýsting og sykursýki sem verða andstuttir við að labba upp tröppur,“ skrifar einn.

Sjálf segir Ellison að athugasemdirnar hafi lítil áhrif á sig og þakkar stuðningsfólki sínu fyrir hvatninguna. Hún á tvö börn fyrir og segist alltaf hafa haft áhuga á íþróttum og vaxtarrækt. Eftir að yngra barn hennar fæddist fannst henni þó kominn tími til að færa áhugann upp á næsta stig.