Fundu 1,3 tonn af kókaíni í flugvél Air-France

Franska lögreglan lagði fyrr í mánuðinum hald á 1,3 tonn af hreinu kókaíni á Charles de Gaulle flugvellinum í París. Kókaínið var um borð í flutningaflugvél Air France.

Innanríkisráðherra Frakklands, Manuel Valls, hélt í dag blaðamannafund þar sem hann sagði þetta stærsta fíkniefnafund í sögu Parísar. Hann segir efnin hafa fundist 11. september og að þeim hafi verið komið fyrir í 30 ferðatöskum um borð í vélinni. Talið er að verðmæti þeirra sé um 32 milljarðar króna. Á fréttavef france24 kemur fram að talið er að efnin hafi upprunalega komið frá höfuðborg Venesúela, Caracas en vélin kom þaðan.

Sex voru handteknir í tengslum við málið en þeir eru grunaðir um að vera aðilar að alþjóðlegum smyglhring. Valls sagði einnig frá því á fundinum að fjögur tonn af kókaíni hefðu verið gerð upptæk í einu lagi í París snemma á þessu ári.