Merkel á sigurinn vísan í þingkosningum

Þingkosningar fara fram í Þýskalandi í dag en Angela Merkel, kanslari Þýskalands, á sigurinn vísan.

Kjörstaðir opnuðu klukkan sex að íslenskum tíma í morgun en kosið verður til klukkan fjögur. Skoðanakannanir gefa til kynna að Angela Merkel, Þýskalandskanslari, beri sigur úr býtum, þriðja kjörtímabilið í röð.

Sem leiðtogi áhrifamesta þjóðríkis og efnahagsveldis Evrópu hefur Merkel þurft að takast á við miklar áskoranir í kjölfar efnahagskreppunnar og er af mörgum álitin holdgervingur óhóflegs niðurskurðar og aðhalds.

Þrátt fyrir þetta virðist ekkert lát á vinsældum kanslarans. Þannig er gert ráð fyrir að Kristilegir demókratar, flokkur Angelu Merkel, vinni stórsigur í dag með tæp þrjátíu og níu prósent atkvæða. Það er þó nokkur óvissa um stjórnarsamstarfið enda er útlit fyrir að Frjálsir demókratar nái ekki manni inn á þing.

Merkel hefur haft orð á því að Kristilegir demókratar séu reiðubúnir að fara í stjórnarsamstarf með Jafnaðarmannaflokknum sem samkvæmt könnunum á von á um tuttugu og sex prósent atkvæða.

Verði það raunin mun Merkel taka höndum saman við sinn helsta keppinaut, Peer Steinbrueck. Sama hver niðurstaða kosninganna verður í dag liggur fyrir að ný ríkisstjórn mun ekki líta dagsins ljós fyrr en að nokkrum vikum liðnum.