Ráðherra sakfelldur fyrir mútuþægni og spillingu

Bo Xilaj, fyrrverandi viðskiptaráðherra Kína, var í nótt fundinn sekur um mútuþægni, misnotkun valds í embætti og umfangsmikinn fjárdrátt en ráðherran fyrrverandi hlaut ævilangan fangelsisdóm. 

Mikið hefur verið fjallað um mál Bo en hann var einn af valdamestu leiðtogum Kína þangað til í fyrra þegar hann var færður úr embætti. Hann var sakaður um að hafa nýtt embætti sitt til að draga að sér meira en þrjár milljónir dala, meðal annars úr opinberum sjóðum og með mútuþægni.

Eiginkona hans, Gu Kailai, var í fyrra fundinn sek um að hafa myrt breska kaupsýslumanninn Neil Heywood en Bo var meðal annars fundinn sekur um að hafa notað embætti sitt til að hylma yfir með henni. Eiginkona Bo var í fyrra dæmd til dauða og var hann í kjölfarið rekinn úr framkvæmdastjórn kommúnistaflokksins.

Bo hefur ávallt haldið fram sakleysi sínu en ekki var fallist á varnir hans í dag. Hann hefur tíu daga til að áfrýja dóminum en líklegt þykir að hann muni áfrýja dóminum.