Fleiri danskir karlar í fitusog

Dönskum körlum sem grípa til þess ráðs að fara í fitusog hefur farið stórlega fjölgandi síðustu ár.

Í nýrri tölfræði sem sagt er frá á vef Danska ríkisútvarpsins, DR, kemur fram að á síðasta ári hafi 204 menn leitað á náðir lýtalækna til að vinna á fitusöfnun, miðað við 35 karla árið 2001.

Benedikte Thuesen, sérfræðilæknir á Københavns Privathospital, segir að oft sé um að ræða menn í kjörþyngd, eða þar um bil, sem hafa einfaldlega ekki náð af sér fitu á ákveðnum svæðum.

Anna Jørgensen á Roskilde Privathospital tekur undir slíkt.

„Þetta er aðallega fitusog á brjóstum og við ástarhandföngin,“ segir hún og bætir því við að það sé orðið mun viðteknara að gangast undir fegrunaraðgerðir.

Læknar leggja þó áherslu á að fitusog ætti ávallt að vera síðasta úrræði, sökum áhættu sem skapast af slíkum aðgerðum. Þá sé borin von að þetta skili árangri nema til komi heilbrigðari lífsstíll.

Því mælir Thuesen frekar með því að láta reyna á líkamsrækt og fitubrennslu áður en menn panda fitusog.

„Það er bæði betra, hollara og ódýrara.“