Leiðtogi Frjálsra demókrata segir af sér

Philipp Rösler, leiðtogi Frjálsra demókrata í Þýskalandi, hefur sagt af sér eftir að flokkurinn datt út af þingi í kosningum í gær.

Öll forysta flokksins hefur sömuleiðis ákveðið að segja af sér, enda útkoman meiriháttar áfall fyrir flokksmenn.

Frjálsir demókratar hafa áratugum gegnt lykilhlutverki í þýskum stjórnmálum, þrátt fyrir að hafa jafnan haft miklu minna fylgi en stóru flokkarnir tveir, Jafnaðarmenn og Kristilegir demókratar.

Flokkurinn fékk 4,8 prósent atkvæða og náði þar með ekki fimm prósenta markinu, sem þarf til að koma manni inn á þing í Þýskalandi.

Líklegt þykir að Christian Lindner, leiðtogi flokksins í þýska sambandslandinu Norður-Rín og Westfalen, taki við forystuhlutverkinu og reyni að ná flokknum á strik á ný.

Brotthvarf Frjálsra demókrata af þingi þýðir að stjórnarmeirihluti Angelu Merkel, leiðtoga Kristilegra demókrata, er fallinn. 

Merkel vann yfirburðasigur í kosningunum, en þarf nú að að leita til annars flokks um stjórnarsamstarf. Beinast liggur við að stóru flokkarnir tveir myndi samsteypustjórn, en þeir stjórnuðu saman á árunum 2005 til 2009.