Krefjast ótímabundins fangelsisdóms yfir ofbeldishrotta og nauðgara

Dómsmál hófst í Sönderborg í Suður-Jótlandi í morgun yfir 22ja ára karlmanni sem ákærður er fyrir nauðganir, ofsóknir og grófar líkamsárásir á hendur fjórum stúlkum. Jótlandspósturinn segir frá.

Brotin áttu sér stað á árunum 2009 til 2011, samkvæmt ákærunum, og voru stúlkurnar kærustur hans. Tvær þeirra voru aðeins fjórtán ára gamlar þegar brotin voru framin.

Ákæruvaldið krefst ótímabundindins fangelsisdóms yfir manninum, en verði það niðurstaðan verður hann í fangelsi þar til að dómurinn hefur komist að þeirri niðurstöðu að samfélaginu stafi ekki lengur ógn af honum.

Málið kom til kasta lögreglu fyrir réttum tveimur árum þegar ein stúlkan gaf sig fram við lögreglu og kærði manninn. Hún vildi síðar draga kæruna til baka, en lögregla var þá komin vel á veg með rannsóknina og hafi haft upp á hinum þremur stúlkunum.

Maðurinn neitaði að tjá sig við lögreglu á meðan rannsókn stóð, en lýsti sig saklausan af ákærunum fyrir dómi.

Dóms er að vænta í málinu hinn 3. desember.