Bræðralag múslima bannað

Starfsemi Bræðralags Múslima í Egyptalandi hefur verið bönnuð með dómsskipun.

Stjórnsýsluréttur í Kaíró úrskurðaði í dag að öll starfsemi Bræðralagasins, hvort sem um væri að ræða stjórnmálaarm samtakanna eða nokkra aðra einingu á þeirra vegum, væri bönnuð.

Þá var stjórnvöldum gert að gera fjármuni Bræðralagsins upptæka.

Ekkert hefur enn verið gefið upp um ástæður að baki þessum úrskurði, en stjórnvöld hafa lagst með miklum þunga á Bræðralag múslima allt frá því að Múhameð Morsí, einum forsvarsmanna samtakanna, var velt úr forsetastóli í júlí.

Auk þess var stjórnarskrá sem samin var undir áherslum Bræðralagsins, sem sigraði í þingkosningunum árið 2011, felld úr gildi. Síðan þá hafa hundruð fylgismanna Morsís fallið í átökum við stjórnarherinn og lögreglu og tugir aðrir forvígismanna samtakanna hafa verið handteknir.