Uppreisnarhópar í Sýrlandi hafna Þjóðarbandalaginu

Þrettán hópar sýrlenskra íslamista afneita í sameiginlegri yfirlýsingu öllum tengslum við Sýrlenska þjóðarbandalagið, samtök sýrlenskra stjórnarandstæðinga sem Vesturlönd hafa stutt.

„Engir hópar sem stofnaðir voru erlendis og hafa ekki snúið aftur til landsins eru fulltrúar okkar,” segir í yfirlýsingunni.

Þeir hvetja sýrlenska uppreisnarmenn jafnframt til að sameinast undir merkjum íslams.

Herskáir íslamistar hafa orðið æ meira áberandi meðal uppreisnarmanna í Sýrlandi og eru nú taldir skipta tugum þúsunda. Sumir þeirra eru með tengsl við Al Kaída.

Þetta gerist sama daginn og efnavopnaeftirlitsmenn frá Sameinuðu þjóðunum snúa aftur til Sýrlands, til að hafa umsjón með eyðingu sýrlenskra efnavopna samkvæmt samkomulagi við Rússland og Bandaríkin.

Sýrlensk stjórnvöld neita enn að hafa notað efnavopn í stríðinu, og Rússar leggja heldur ekki trúnað á ásakanir Vesturlanda um að stjórn Assads Sýrlandsforseta beri ábyrgðina.