Rouhani vill semja um kjarnorkuáætlun Íran

Forseti Írans, Hassan Rouhani segir að Íranir vilji komast að samkomulagi við önnur ríki heimsins um kjarnorkuáætlun þeirra fyrrnefndu inna sex mánaða.

Málið hefur verið þrætuepli í áraraðir og því þykja afdráttarlausar yfirlýsingar hins nýja forseta landsins gefa von um árangur. Rouhani er í viðtali í bandaríska stórblaðinu Washington Post í morgun þar sem hann segist sjá fyrir sér að lausn deilunnar gæti verið fyrsta skrefið í átt að betri samskiptum Írana og Bandaríkjamanna.

Rouhani tók það einnig fram að Ayjatollah Khameini æðstiklerkur og valdamesti maður Írans stæði heilshugar á bakvið sig í þessum áformum. Aðalþing Sameinuðu þjóðanna stendur nú yfir í New York og síðar í dag mun utanríkisráðherra Írans, Javad Zarif, hitta starfsbræður sína frá Bretlandi, Frakklandi, Rússlandi, Kína, Þýskalandi og Bandaríkjunum á sérstökum fundi.