Tala látinna í Pakistan hækkar

Tala látinna eftir jarðskjálftann sem reið yfir Pakistan í vikunni hefur hækkað og stendur nú í 348.

Um fimmhundruð liggja slösuð á sjúkrahúsi og 21 þúsund heimili jöfnuðust við jörðu, að því er fram kemur hjá fréttastofu CNN. Skjálftinn var 7,7 stig og reið yfir afar strjálbýlt svæði í Balokistan í suðvesturhluta Pakistans. Björgunaraðgerðir eru í fullum gangi en sökum þess hve svæðið er strjálbýlt er afar erfitt um vik og ljóst að ekki hefur náðst til allra þeirra sem urðu fyrir skjálftanum. Því er líklegt að tjón af völdum skjálftans sé enn meira en þegar hefur komið í ljós.