Sígarettur hverfa í stórum stíl

Bandaríska löggæslustofnunin ATF, sem fylgist með sölu og dreifingu á áfengi, tóbaki og skotvopnum í Bandaríkjunum hefur týnt 420 milljón sígarettum sem lagt var hald á í aðgerðum gegn ólöglegri sölu á slíkum varningi.

Þetta kemur fram í nýrri skýrslu um stofnunina sem ætlar var að varpa ljósi á starfshætti hennar en greint er frá málinu á fréttasíðu BBC. Skýrslan leiddi einnig í ljós að fulltrúar stofnunarinnar höfðu selt tóbak í leynilegum aðgerðum til margra ára og nam hagnaður sölunnar samtals 162 milljónum dollara, eða tæpum tuttugu milljörðum íslenskra króna. Ágóðinn var notaður til þess að fjármagna leynilegar aðgerðir stofnunarinnar á árunum 2006 til 2011.