Eiturlyf sem étur upp holdið komið til Bandaríkjanna

Tvö tilfelli af eiturlyfinu Krókódíll hafa verið tilkynnt í Bandaríkjunum og eru læknar þarlendis uggandi yfir dópinu sem hefur hræðilegar aukaverkanir samkvæmt Huffingtonpost.

Krókódíll er heimatilbúið eiturlyf sem veldur alvarlegum skaða á holdi neytandans. Um leið og efnið hefur verið tekið inn, skaðar það æðar og vefi sem veldur því að holdið rotnar.

Sárin sem neytendur fá minna á krókódílahúð og dregur eiturlyfið nafnið sitt af því. Meðallíftími krókódílaneytenda er um þrjú ár.

Eiturlyfið er ógreinanleg og banvæn blanda en er talin vera gerð úr kódeini og vetniskolefnum eins og olíu, málningaþynni, bensíni eða alkahóli. Neytendur sía og sjóða efnið fyrir neyslu og telja að með því séu þeir að fjarlægja óhreinindi en það er ekki svo.  

Myndir af neytendum með hræðileg sár og rotið hold hafa gengið um netið og eru sagðar upprunnar frá Rússlandi, þar sem talið er að nokkur hundruð þúsund til milljón manns hafi tekið inn lyfið árið 2010.

Ástæðan fyrir vinsældum lyfsins, þrátt fyrir hræðilegar aukaverkanir, er að það er tuttugu sinnum ódýrara en heróin en gefur svipaða vímu.

KLTV.com-Tyler, Longview, Jacksonville, Texas | ETX News