Ákærðir í hrottalegu nauðgunarmáli

Fjórir menn bíða nú dóms í Nýju Delhí en þeir eru ákærðir fyrir morðið á 23 ára gamalli stúlku sem þeir réðust á og nauðguðu í strætisvagni í borginni í desember á síðasta ári.

Mennirnir misþyrmdu stúlkunni hrottalega og hentu henni svo út úr vagninum á ferð en hún lést af sárum sínum tveimur vikum síðar. Málið vakti gríðarlega athygli á Indlandi og í heiminum öllum þegar það kom upp og efnt var til ákafra mótmæla í mörgum borgum landsins.

Mennirnir neita allir sök í málinu en þeir gætu átt dauðadóm yfir höfði sér, verði þeir fundnir sekir.