Leikari sýknaður af ákærum um barnaníð

Breski leikarinn Michael Le Vell var í dag sýknaður af ákærum um barnaníð, en hann var ákærður í 12 liðum fyrir nauðganir og önnur kynferðisbrot gegn barni.

Le Vell, sem heitir réttu nafni Michael Turner, neitaði sök í öllum ákæruliðum en meðal þeirra eru voru fimm nauðgunarákærur. Brotin gegn stúlkunni voru talin hafa átt sér stað á árunum 2001 til 2010, eða frá því að stúlkan var sex ára og þar til hún varð 14 ára.

„Þakka ykkur fyrir,“ sagði leikarinn eftir að kviðdómurinn sýknaði hann og sagði hann við fréttamenn fyrir utan dómshúsið að þungu fargi væri af sér létt.

Ekki liggur fyrir hvort hann muni eiga afturkvæmt á sjónvarpsskjáinn, en hann hefur undanfarin 30 ár leikið eitt af aðalhlutverkum vinsælu sápuóperunnar Coronation Street og vakti málið því mikla athygli breskra fjölmiðla.