Sýrlendingar lofa að opna efnavopnabúrin

Sýrlandsstjórn lofaði í dag að opna efnavopnabúr sín upp á gátt, veita alþjóðlegu vopnaeftirliti aðgang að þeim, hætta framleiðslu þeirra og undirrita jafnframt alþjóðasamning um bann við efnavopnum. 

Þessu fylgir að í fyllingu tímans verði sýrlensku efnavopnin eyðilögð.

Ágreiningur er enn á milli bandarískra og rússneskra stjórnvalda um það, hvort í væntanlegri ályktun öryggisráðs Sameinuðu þjóðanna eigi að felast hótanir um valdbeitingu standi Sýrlendingar ekki við þessi loforð.

Rússar hafna slíku alfarið, en Bandaríkin vilja að í ályktuninni verði varnaglar sem tryggi að Sýrlandsstjórn standi við loforðin.

Vladimír Pútín Rússlandsforseti sagði í dag að áætlun Rússa, sem Sýrlendingar hafa nú fallist á, geti einungis borið árangur ef Bandaríkin hafna öllum áformum um valdbeitingu.

Á Bandaríkjaþingi hafa umræður haldið áfram í dag um hvort veita eigi Barack Obama forseta heimild til að ráðast á Sýrland. Frakkar hafa sömuleiðis haldið áfram að vinna að því að leggja harðorða ályktun um Sýrland fyrir öryggisráðið, þar sem Sýrlandsstjórn er sögð bera ábyrgð á notkun efnavopna.

Enn er óvíst hvort Obama fær stuðning þingsins til árása. Bandarískur almenningur er samkvæmt skoðanakönnunum lítt hrifinn af þessum áformum og fá ríki hafa lýst áhuga á að slást í hópinn með Bandaríkjunum og Frökkum komi til árása gegn Sýrlandsstjórn.