Regnhlífarmorðið fyrnt í Búlgaríu

Sotir Tsatsarov, aðalsaksóknari Búlgaríu, segir að óupplýst morð á Georgí Markov í London árið 1978 verði ekki rannsakað frekar. Málið sé fyrnt samkvæmt búlgörskum lögum vegna þess að nú séu 35 ár liðin.

Markov var búlgarskur blaðamaður og andófsmaður, sem flúði land árið 1969. Þann 7. september árið 1978 stóð hann við strætisvagnastöð á Waterloo-brúnni í London. Hann var á leiðinni í vinnu sína á Búlgaríudeild breska útvarpsins BBC.

Maður með regnhlíf kom þar að og stakk hann í lærið með eitruðum broddi regnhlífarinnar. Markov fann fyrir smá sting í aftanverðu hægra læri sínu, en hélt síðan í vinnuna eins og ekkert hefði í skorist. Fjórum dögum síðar, þann 11. september, var hann látinn.

Grunur féll fljótt á búlgörsku leyniþjónustuna, en enginn hefur verið handtekinn eða ákærður vegna morðsins. 

Mikið hefur verið fjallað um þetta morð í fjölmiðlum. Búlgarska leyniþjónustan er sögð hafa áður gert tvær tilraunir til að myrða Markov, en það heppnaðist ekki fyrr en í þriðju tilrauninni.

Leyniþjónustumaður að nafni Francesco Gullino hefur verið nefndur til sögunnar sem hugsanlegur morðingi Markovs.

Samkvæmt breskum lögum fyrnast morð ekki, og Tsatsarov segist reiðubúinn til að veita bresku lögreglunni alla aðstoð, verði málið rannsakað áfram þar.