Neyðarástand framlengt í Egyptalandi

Adlí Mansúr, bráðabirgðaforseti Egyptalands, hefur framlengt neyðarástand í landinu um tvo mánuði, en það átti að renna út eftir nokkra daga.

Neyðarástandið, með útgöngubanni á næturna í flestum stærri borgum landsins, hefur verið í gildi í tæpan mánuð, eða frá því stuttu eftir að stjórnvöld réðust til atlögu gegn stuðningsmönnum Múhammeds Morsís, fyrrverandi forseta, en honum var steypt af stóli í byrjun júlí.

Sú atlaga snerist upp í hörð átök sem kostuðu nærri þúsund manns lífið, en æ síðan hafa stuðningsmenn Morsís komið saman til mótmæla nær daglega. 

Jafnframt hafa árásir á opinberar byggingar og kirkjur kristinna manna orðið tíðari, einkum í suðurhluta landsins og á Sínaískaga.

Um tvö þúsund íslamistar, bæði liðsmenn Bræðralags múslima og aðrir, hafa verið handteknir á síðustu vikum, sakaðir ýmist um að hafa framið eða hvatt til ofbeldis í þeim tilgangi að grafa undan bráðabirgðastjórninni og stöðugleika í landinu.