Önnur kynslóð innflytjenda aðlagast betur dönsku samfélagi

Innflytjendur af annarri kynslóð í Danmörku hafa aðlagast dönskum lífsháttum betur en foreldrar þeirra.

Ekki að það komi fræðimönnum sérlega á óvart en samkvæmt niðurstöðum í nýrri rannsókn sem Rockwool-rannsóknarsetrið gerði eru innflytjendur af annarri kynslóð mun líkari Dönum í lifnaðarháttum og hugsunargangi en búist var við.

Rannsóknin var gerð meðal fólks sem átti ættir að rekja til Tyrklands, Pakistan, Líbanon, Íraks og fyrrverandi ríkjum Júgóslavíu.

Meðal þess helsta sem kom fram í rannsókninni var að konur sem eru af annarri kynslóð innflytjenda ganga seinna í hjónaband og eignast seinna börn en mæður þeirra.

Helsta ástæðan fyrir þessu er talin vera aukin menntun kvennanna. Einnig kemur í ljós að skilnaðartíðni afkomendanna er hærri en foreldranna.

Skilnaðartíðnin er einnig hærri en hjá Dönum. Ástæðan fyrir því er talin vera sú að fólk frá þessum löndum er líklegra til að gifta sig áður en það hefur sambúð og eignast börn og því mögulega ekki búið að reyna nægilega vel á sambúðina áður en til hjónabands kemur.

Einnig þykir þetta sýna að afkomendur innflytjenda séu orðnir áhættusæknari en foreldrarnir, og þannig farnir að líkjast meira Dönum í þeim málum.

Jens Bonke, einn rannsakenda, segir að undarlegt væri ef önnur kynslóð innflytjenda væri ekki betur aðlöguð samfélaginu en foreldrarnir.

„Því lengur sem maður er með öðrum í samfélagi, því meiri áhrif hefur það á mann. Maður tileinkar sér eðlilega þau gildi og þá hegðun sem maður lærir af umhverfinu," segir Jens Bonke í viðtali við Politiken.

Tekið er fram í rannsókninni að það séu þó enn einstaklingar af báðum kynslóðum sem eigi erfitt með að aðlagast samfélaginu en þeir sem koma frá fyrrverandi ríkjum Júgóslavíu og Pakistan ná almennt að fóta sig best í dönsku samfélagi.