Lavrov og Kerry funda stíft

Utanríkisráðherra Bandaríkjanna og Rússlands, þeir John Kerry og Sergei Lavrov, funda enn stíft í Genf í Sviss en fundir þeirra hófust í gær.

Umræðuefnið er hvernig koma eigi efnavopnum sýrlensku stjórnarinnar undir örugga stjórn Sameinuðu þjóðanna. Kollegarnir ræddu saman í klukkustund í gær og segir fréttamaður BBC sem staddur er í sviss að svo virðist sem þá greini á í nokkrum veigamiklum atriðum. Í dag er gert ráð fyrir að Lahktar Brahimi, erindreki Sameinuðu þjóðanna og Arababandalagsins bætist í hópinn.

Meðal ágreiningsefnanna er yfirlýsing Assads Sýrlandsforseta þess efnis að hann muni hefja flutning vopnanna eftir mánuð. Það segir Kerry að sé allt of langur tími og krefst tafarlausra viðbragða.