Froskur á leið til tunglsins?

Bandaríska geimferðastofnunin NASA hefur staðfest að mynd af froski, sem virðist þeytast upp með geimskoti, sé ófölsuð.

Ekkert er þó vitað um örlög frosksins eða af hverju hann var þarna.

Myndin var tekin með sjálfvirkri myndavél á föstudaginn var þegar LADEE geimfarinu var skotið upp frá skotpalli stofnunarinnar á Wallops-eyju í Virginíu.

Þegar myndin var skoðuð nánar kom í ljós að froskur sést greinilega á myndinni. Ekki er annað að sjá en hann hafi verið sprellifandi þegar myndin var tekin, og raunar er engu líkara en hann ætli sér að fljúga til tunglsins, sömu leið og geimfarið.

Geimfarið, sem er ómannað, á að fara til tunglsins til að rannsaka hið ofurþunna andrúmsloft, sem þar er að finna. Flaugin á að fljúga umhverfis tunglið í hundrað daga samfleytt í 20 til 60 kílómetra hæð og safna gögnum.