Smitaðist af HIV eftir nokkra mánuði í klámi

Klámleikkonan Cameron Bay tilkynnti um það í síðasta mánuði að hún hefði greinst með HIV-veiruna. Í kjölfarið var allri framleiðslu kláms í San Fernando-dalnum í Kaliforníu hætt í nokkra daga. Aðeins eru örfáir mánuðir liðnir síðan Bay lék í sinni fyrstu klámmynd og í henni tók hún þátt í hópkynlífi með tíu manns. Níu myndum síðar greindist hún með veiruna.

Sjálf segir Bay að ekki hafi verið notaðir smokkar í neinum af þeim atriðum sem hún lék í. Henni hafi verið sagt að hún ætti ekki einu sinni að vekja máls á notkun verja því að nóg væri til af stúlkum sem gætu tekið hennar stað.

„Ég lærði það að það er alltaf einhver yngri og kynþokkafyllri sem er tilbúin að gera hluti sem þú ert ekki til í að gera,“ segir Bay í samtali við Huffington Post, sem var með ítarlega umfjöllun um málið í vikunni, og segir Bay að smokkar ættu að vera valkostur.

Í nóvember á síðasta ári voru sett lög um það í Los Angeles, þar sem meirihluti bandarísks kláms er framleitt, að leikarar í klámmyndum þyrftu að nota smokka þrátt fyrir harða andstöðu klámframleiðenda. Að sögn innanbúðarfólks í klámframleiðslu hefur lögunum þó ekki verið fylgt.

Fékk nýrnasýkingu eftir fyrsta atriðið

Eftir að hafa stundað kynlíf með fimm karlmönnum í fyrsta atriðinu sínu veiktist Bay alvarlega vegna nýrnasýkingar, en öll atriðin voru tekin upp í Los Angeles fyrir utan eitt sem tekið var upp í San Fransisco. Það var atriði fyrir klámframleiðanda sem sérhæfir sig í BDSM-myndum og í atriðinu hafði Bay endaþarmsmök. Henni var boðið að nota smokk en sagðist vilja að mótleikari hennar réði því sjálfur og var smokkur ekki notaður.

Í atriðinu var Bay slegin af aukaleikara í annað brjóstið og hlaut hún áverka á brjóstvef. Var henni skipað af lækni að taka sér frí frá klámmyndaleik í tvær vikur á meðan vefurinn jafnaði sig. Að því loknu átti hún að fara í aðgerð en henni hefur nú verið frestað eftir að hún greindist með veiruna.

Í sama atriði segir Bay að „mjög slæmir hlutir“ hafi átt sér stað en upplýsir ekki um hvað gekk á. „Við skulum bara segja að það hafi komið svolítið upp á og við hefðum átt að hætta tökum.“

Kærasti Bay, Rod Daily, greindist einnig með HIV-veiruna fyrir stuttu en hann leikur í klámi fyrir samkynhneigða og hefur aldrei leikið á móti Bay, en hún segist vonast til þess að klámleikarar verði meðvitaðri um áhætturnar sem fylgi starfinu og geti tekið upplýstar ákvarðanir.

„Á endanum snýst þetta allt um öryggi. Blað um það að þú sért laus við kynsjúkdóma segir ekki neitt.“