Túlkaþjónusta heyrnarlausra: Gjaldskrá hefur hækkað en ekki framlög ráðuneytisins

Barátta heyrnarlausra fyrir túlkaþjónustu hefur staðið lengi. Þegar mál hafa komið til kasta dómstóla hefur réttur til túlkaþjónustu í samskiptum við opinbera aðila verið staðfestur en erfiðara hefur reynst að festa í sessi rétt til þjónustunnar í daglegu lífi. Árið 2004 tryggði þáverandi menntamálaráðherra, Þorgerður Katrín Gunnarsdóttir, fjármagn í sjóð sem ætlaður var þessu hlutverki og sér Samskiptamiðstöð heyrnarlausra  um dreifingu fjármagnsins.

„Við fáum 12,6 milljónir fyrir þetta ár. Þegar mest var fengum við 14 milljónir en eftir hrun lækkaði upphæðin, þá var flatur niðurskurður á allt þannig að krónutalan lækkaði og hefur ekki hækkað síðan. Gjaldskrá fyrir túlkaþjónustu hefur hins vegar hækkað og það er menntamálaráðuneytið sem setur gjaldskrána. Þessi upphæð hefur ekki fylgt þeirri hækkun,“ segir  Valgerður Stefánsdóttir, forstöðumaður Samskiptamiðstöðvar heyrnarlausra.

Hækkun gjaldskrár fyrir túlkaþjónustu hefur minnkað umfang þjónustunnar mikið. „Sem dæmi þá gátum við túlkað fyrsta heila árið sem við fengum þetta framlag um það bil 2200 tíma, en við erum með rúma 1200 tíma í ár,“ segir Valgerður.

Lög mæla fyrir um að íslenskt táknmál sé jafnrétthátt íslensku og að óheimilt sé að mismuna fólki eftir því hvort málið það notar. Má því velta fyrir sér hvort staðan sem nú er komin upp brjóti gegn þessum lögum.

Sjóðurinn þjónar um 200 manns og kemur inn á öll svið daglegs lífs heyrnarlausra og oft atvinnu þeirra. Valgerður segir slæma forgangsröðun við úthlutun úr sjóðnum ekki skýra stöðuna. „Við forgangsröðum ekki vegna þess að við teljum okkur ekki vera í aðstöðu til að ákveða hvernig fólk ver lífi sínu eða hvað því finnst mikilvægt að gera. Það er þess að ákveða það.