Nefndin segir sarín hafa verið notað á almenna borgara

Rannsóknarteymi frá Sameinuðu þjóðunum, sem dvaldist í Sýrlandi nýverið og aflaði gagna á vettvangi í úthverfum Damaskusborgar, segist hafa í höndunum sannfærandi gögn um að efnavopn hafi í raun verið notuð þar þann 21. ágúst.

Bandaríska fréttastofan AP fullyrðir þetta, og vitnar í skýrslu nefndarinnar. Þar segir að „umhverfissýni, efnafræðileg sýni og læknisfræðileg sýni sem við söfnuðum eru skýr og sannfærandi sönnunargögn þess að flugskeytum með eiturefninu sarín var skotið á Ghouta-hverfið í Damaskus.”

„Niðurstaðan er sú að efnavopnum hefur verið beitt í yfirstandandi átökum í Sýrlandi ... gegn almennum borgurum, þar á meðal börnum í nokkuð miklum mæli,” segir ennfremur á fyrstu blaðsíðu skýrslunnar.

Ban Ki-moon, framkvæmdastjóri Sameinuðu  þjóðanna, mun síðar í dag kynna betur niðurstöður nefndarinnar, eftir að hafa rætt þær á lokuðum fundi í öryggisráði Sameinuðu þjóðanna. 

Åke Sellström, hinn sænski formaður rannsóknarnefndarinnar, afhenti Ban skýrslu nefndarinnar í gær.

Önnur nefnd á vegum Sameinuðu þjóðanna, sem hefur það verkefni að grafa upp staðreyndir um stríðsglæpi í átökunum í Sýrlandi undanfarið, er nú að skoða fjórtán dæmi þess að efnavopn hafi verið notuð þar í landi.

Paulo Sergio Pinheiro, formaður þeirrar nefndar, tók fram í morgun að mikill meirihluti allra dauðsfalla í sýrlensku borgarastyrjöldinni megi rekja til notkunar hefðbundinna vopna.