Ný ríkisstjórn í burðarliðnum í Noregi

Formenn hægriflokkanna í Noregi, Framfaraflokksins, Hægriflokksins, Venstre og Kristilega þjóðarflokksins, hafa ákveðið að hefja viðræður um myndun nýrrar ríkisstjórnar. Þetta kom fram á sameiginlegum blaðamannafundi formanna flokkanna í dag. Tilgangur viðræðanna verður m.a. að kanna mögulegan samstarfsgrundvöll flokkanna og hvort ástæða sé til að hefja formlegar stjórnarmyndunarviðræður.

Hægriflokkur Ernu Solberg vann stórsigur í þingkosningunum í Noregi í síðustu viku og er fastlega búist við því að hún verði forsætisráðherra í nýrri ríkisstjórn. Jens Stoltenberg, forsætisráðherra og formaður Verkamannaflokksins, hefur lýst því yfir að hann muni biðjast lausnar fyrir sig og ráðuneyti sitt í næsta mánuði.