Heimilislaus maður skilaði bakpoka fullum af peningum

Heimilislaus maður í Boston í Bandaríkjunum sem fann bakpoka með 42 þúsund dollurum, rúmlega 5 milljónum króna, í verslunarmiðstöð á dögunum skilaði reiðufénu til lögreglunnar.

Maðurinn, sem heitir Glen James, fann bakpokann í South Bay verslunarmiðstöðinni. Hann sagði lögreglumönnunum einungis frá nafni sínu og athvarfinu sem hann býr í.

Í bakpokanum var vegabréf eigandans, sem reyndist vera kínverskur ríkisborgari. Lögreglan hafði uppi á honum og var hann afar þakklátur.

Lögreglustjórinn í bænum heiðraði James fyrir að vera heiðarlegur borgari.