Strandaglópar í Akapúlkó

Rúmlega tvö þúsund ferðamenn hafa verið fluttir í herflutningavélum frá sumardvalarstaðnum Akapúlkó í Mexíkó, þar sem þeir höfðu verið strandaglópar eftir mikil flóð af völdum hitabeltisstormsins Manúels.

Það er þó aðeins brot af þeim fjölda sem eru fastir í borginni vegna veðursins en talið er að um fjörutíu þúsund ferðamenn til viðbótar komist hvorki lönd né strönd. Manúel hefur skilið eftir sig slóð eyðileggingar og að minnsta kosti fimmtíu hafa látið lífið af hans völdum. Einna verst er ástandið í Akapúlkó en öll vesturströnd landsins hefur orðið illa úti.