Fegurðarsamkeppnir barna bannaðar

Efri deild franska þingsins hefur kosið með því að fegurðarsamkeppni barna undir 16 ára aldri verði bannaðar. Þetta er gert í því skyni að verja börn fyrir klámvæðingu. Þetta kemur fram í frétt The Guardian.

Um þetta var kosið á miðvikudaginn eftir að fyrrverandi íþróttamálaráðherra Frakklands, Chantal Jouanno kynnti bannið sem hluta af baráttu fyrir jafnrétti.

„Við skulum ekki leyfa stúlkunum okkar að trúa því frá unga aldri að útlitið sé það eina sem skipti máli fyrir þær í lífinu,“ sagði Chantal Jouanno.  „Við höfum þeirri skyldu að gegna að verja hagsmuni barna.“

Verði bannið að lögum verða refsingar við því að halda fegurðarsamkeppnir fyrir börn yngri en 16 ára. Skipuleggjendur slíkra keppna geta búist við allt að tveggja ára fangelsi og sekt allt að fimm milljónum íslenskra króna.