Sakaður um óviðeigandi athugasemd um lík Whitney Houston

Brian Weir, fyrrverandi sérsveitarmaður í Beverly Hills, hefur sakað rannsóknarlögreglumanninn Terry Nutall um ósæmilega hegðun við rannsókn á andláti poppsöngkonunnar Whitney Houston í fyrra.

Nutall er sagður hafa lyft upp laki sem búið var að breiða yfir kynfæri Houston og meðal annars sagt hana aðlaðandi miðað við „aldur og ástand“. Þá er hann einnig sagður hafa skemmt lífsýni og að meðferð hans á líkinu hafi verið skammarleg.

Weir hefur stefnt yfirvöldum í Beverly Hills, lögreglunni og lögreglustjóra, og segir hann sér hafa verið refsað á óréttlátan hátt eftir að hann kvartaði. Honum hafi verið vísað úr sérsveitinni og orðið fyrir áreitni frá öðrum lögreglumönnum.