Fékk 3,8 milljóna símreikning fyrir að kíkja á Facebook

Bresk kona fékk símreikning upp á rúmar 3,8 milljónir króna eftir að hún setti inn nokkrar myndir á Facebook meðan hún dvaldi í Tyrklandi í sumarleyfi. Símreikningurinn er 28 sinnum hærri en sú upphæð sem Helen Christie borgaði fyrir sumarleyfisferð sína til Tyrklands.

„Ég ætlaði bara að setja nokkrar myndir inn á Facebook. Ég átti svo sannarlega ekki von á þessu,“ segir Christie. „Þetta er algjörlega viðbjóðsleg framkoma. Fólk áttar sig ekki á því hvernig þessi símafyrirtæki haga sér.“

Símafyrirtækið Orange, sem Christie skiptir við, ákvað að lækka reikninginn niður í 875 pund eða því sem nemur um 167 þúsund krónum. Christie sættir sig ekki við þann reikning ætlar með málið fyrir dómstóla.