Verkfalli á Kastrup lokið - hundrað farþegar Icelandair misstu af flugi

Skyndiverkfalli öryggisvarða á Kastrup flugvelli í Kaupmannahöfn er lokið. Verkfallið hófst klukkan sex á dönskum tíma og stóð í fjórar klukkustundir með þeim afleiðingum að gríðarlega langar raðir mynduðust og nokkrar vélar þurftu að fara tómar eða hálftómar í loftið. Talsmenn flugvallarins segja að þrátt fyrir að verkallinu sé lokið megi búast við töfum fram eftir degi.

Guðjón Arngrímsson upplýsingafulltrúi Icelandair segir í samtali við fréttastofu að vél Icelandair sem átti að fara til Íslands í morgun hafi þurft að leggja af stað með aðeins um fimmtíu farþega innanborðs. Um það bil hundrað manns þurftu að sitja eftir. Guðjón segir að það verði unnið úr því í dag að koma strandaglópunum fyrir í öðrum vélum.