Þriðjungur Sýrlendinga á flótta

Tarik Kurdi, yfirmaður Flóttamannastofnunar Sameinuðu þjóðanna, segir að nú séu sjö milljónir Sýrlendinga á flótta undan borgarastyrjöldinni.

Þetta er um það bil þriðjungur sýrlensku þjóðarinnar. 

Fimm af þessum sjö milljónum eru á vergangi innan landamæranna, en um tvær milljónir komnar til nágrannalandanna. 

Kurdi segir að hjálparstofnanir ráði engan veginn við að veita öllum þessum fjölda þá aðstoð, sem þörf er fyrir. 

Þá hafa um tvær milljónir barna orðið fyrir beinum áhrifum af völdum átakanna.

Átökin í Sýrlandi hófust fyrir meira en tveimur árum og hafa kostað meira en hundrað þúsund manns lífið.