Ársgamall drengur skotinn til bana í Brooklyn

Ársgamall drengur lést af sárum sínum eftir að hafa verið skotinn í höfuðið þar sem hann sat í barnakerru. Atvikið átti sér stað í Brooklyn á áttunda tímanum í gærkvöldi.

Að sögn lögreglu var drengurinn, Antiq Hennis, með foreldrum sínum  í Brownsville-hverfinu þegar skotárásin varð og er mörgum skotum sagt hafa verið hleypt af. Svo virðist sem drengurinn hafi fengið í sig skot úr haglabyssu og var hann úrskurðaður látinn þegar komið var með hann á spítala. Enginn hefur verið handtekinn vegna málsins en lögregla rannsakar nú vísbendingar um að faðir drengsins hafi verið skotmarkið.

Þetta er önnur skotárásin á rúmri viku í Brooklyn þar sem barn verður fyrir skoti, en þriggja ára drengur var skotinn í höfuðið þar sem hann svaf á heimili sínu þann 24. ágúst. Foreldrar drengsins voru að heiman og hefur vinur barnfóstru þeirra verið ákærður fyrir verknaðinn en drengurinn lifði árásina af.