Réttað yfir leikara í barnaníðsmáli

Réttarhöld hófust í dag yfir breska leikaranum Michael Le Vell en hann er ákærður í tólf ákæruliðum sem snúa að barnaníði. Le Vell hefur undanfarin 30 ár leikið eitt af aðalhlutverkum vinsælu sápuóperunnar Coronation Street og hefur málið vakið mikla athygli breskra fjölmiðla.

Honum er meðal annars gefið að sök að hafa nauðgað sex ára stúlku með hrottafengnum hætti á meðan hann hélt bangsa fyrir vitum hennar. Hann hafi síðan sagt henni að hún myndi deyja ef hún segði frá.

Le Vell, sem heitir réttu nafni Michael Turner, neitar sök í öllum ákæruliðum en meðal þeirra eru fimm nauðgunarákærur. Brotin gegn stúlkunni eru talin hafa átt sér stað á árunum 2001 til 2010, eða frá því að stúlkan var sex ára og þar til hún varð 14 ára.

Áætlað er að réttarhöldin taki um tvær vikur.