Storkur í varðhaldi vegna gruns um njósnir

Storkur var settur í varðhald í Egyptalandi vegna gruns um njósnir eftir að veiðimaður tók eftir dularfullum rafeindabúnaði sem festur hafði verið við fjaðrir hans.

Taldi veiðimaðurinn fuglinn vera njósnara, fangaði hann og fór með hann á lögreglustöð nærri heimili sínu, en hann býr um 450 kílómetrum suðaustur af Kaíró.

Lögreglumenn skoðuðu fuglinn og óttuðust að um njósnabúnað væri að ræða eða jafnvel sprengju. Óskað var eftir aðstoð frá dýralæknum og þá kom í ljós að um staðsetningarbúnað væri að ræða í eigu franskra vísindamanna sem fylgjast með ferðum farfugla. Storkurinn verður þó áfram í haldi lögreglu þar til leyfi fæst frá ríkissaksóknara til að sleppa honum.

Fréttaskýrendur segja ólguna í Egyptalandi í kjölfar þess að Mohamed Morsi, forseta landsins, var steypt af stóli hafa gert það að verkum að almenningur sé sérstaklega var um sig, en fyrr á þessu ári handsamaði öryggisvörður dúfu sem hann hélt að væri með örfilmu á sér.