Obama segir trúverðugleika í húfi

Trúverðugleiki Bandaríkjanna og heimsbyggðarinnar allrar er í húfi, að mati Baracks Obama Bandaríkjaforseta, gagnvart Sýrlandi.

„Við verðum að grípa til aðgerða, því ef við gerum það ekki þá erum við í raun að segja: Sá sem kann ekki að skammast sín geti haldið áfram án ótta við refsingu," sagði Obama á blaðamannafundi í Stokkhólmi ásamt Fredrik Reinfeldt, forsætisráðherra Svíþjóðar.

Hann segist enn gera sér von um að Vladimír Pútín Rússlandsforseta snúist hugur, og segir að aðgerðir gegn Sýrlandsstjórn verði mun áhrifaríkari ef Rússar verða með.

Hann sagði hins vegar að erfitt hafi reynst að fá Rússa til að horfast í augu við glæpi Assads Sýrlandsforseta. Pútín hafi ekki fallist á þau rök Bandaríkjamanna, að jafnvel þótt meðal sýrlenskra uppreisnarmanna séu öfl, sem ástæða sé til að hafa áhyggjur af, þá geti stjórn Assads aldrei aftur notið almennrar viðurkenningar í Sýrlandi eftir að hafa framið ofbeldisglæpi gegn þjóðinni.

Obama kom til Svíþjóðar í morgun þar sem hann mun í kvöld eiga fund með forsætisráðherrum allra Norðurlandanna. Á morgun tekur hann svo þátt í leiðtogafundi 20 stærstu iðnríkja heims í Rússlandi, þar sem hann hyggst reyna að afla frekara fylgis við áform sín um hernað gegn Sýrlandsstjórn.