Sýrland ásteitingarsteinn stórveldanna

Leiðtogar tuttugu stærstu iðnríkja heims sem nú funda í Pétursborg í Rússlandi ná engri sátt um möguleg viðbrögð við ástandinu í Sýrlandi.

Reynt var að ræða málið á kvöldverðarfundi í gærkvöldi en ítalski forsætisráðherrann Enrico Letta segir í twitter-færslu að þar hafi aðeins verið undirstrikað bilið á milli vesturveldanna og Rússa í málinu. Bandaríkjamenn vilja fara í hernað gegn Sýrlendingum en Rússar eru því algjörlega andsnúnir. Talsmaður forsetaembættisins í Rússlandi sagði til að mynda í gærkvöldi að árás Bandaríkjamanna á Sýrland væri enn einn naglinn í líkkistu alþjóðalaga.