Fólksbíll flattist út

Vörubíll með 45 tonna farm af sandi endaði inni í íbúðarhúsi í bænum Bountiful í Utah eftir að bremsur hans biluðu og hann rann aftur á bak niður bratta hlíð. Í innkeyrslu hússins var fólksbíll og varð hann undir vörubílnum og flattist út undan þunganum.

Vörubíllinn tók með sér rafmagnslínur á leið sinni niður brekkuna en það var lán í óláni að íbúar hússins sátu að snæðingi í hinum enda íbúðarinnar þegar vörubíllinn lenti á húsinu.

„Hann var alveg flatur,“ sagði eigandi hússins sem heyrði sprengingu þegar vörubíllinn kramdi fólksbílinn. „Bíllinn var seldur í gær, það er það fyndna,“ bætti eigandinn við.