Lífvörður Hitlers látinn

Rochus Misch, fyrrverandi lífvörður Adolfs Hitler, lést á þriðjudag eftir veikindi, 96 ára að aldri.

Misch starfaði við hlið Hitlers í fimm ár í seinni heimsstyrjöldinni og var einn af þeim sem komu að honum látnum í neðanjarðarbyrgi sínu eftir að hann framdi sjálfsvíg þann 30. apríl 1945.

Eftir að Misch yfirgaf byrgið var hann handsamaður af Sovétmönnum en eftir að hann var látinn laus árið 1954 settist hann að í Berlín þar sem hann bjó til dauðadags.

„Hann var ekki skrímsli,“ sagði Misch um Hitler í samtali við AP árið 2005 og sagði hann hafa verið „ósköp venjulegan mann“.

Misch hefur fengið töluvert af aðdáendabréfum þar sem meðal annars er óskað eftir eiginhandaráritun frá honum en fyrir þremur árum hætti hann að svara þeim sökum aldurs. „Bréfin komu frá Kóreu, Knoxville, Tennessee, frá Finnlandi og Íslandi og enga óvild var að finna í neinu þeirra,“ sagði hann um bréfin við þýskt dagblað árið 2010.

Þá hefur hann verið persóna í kvikmyndum vegna nálægðar sinnar við Hitler og einnig tekið að sér hlutverk handritsráðgjafa. Til dæmis var hann Christopher McQuarrie, handritshöfundi kvikmyndarinnar Valkyrie, innan handar við skrifin. Tom Cruise, aðalleikari myndarinnar, neitaði hins vegar að hitta Misch og færði rök fyrir því í viðtali við Los Angeles Times: „Ég vildi ekki hitta hann. Illska er alltaf illska, sama hversu gamall þú ert.“