Eldsprengjur fljúga í Istanbúl

Til átaka kom í Istanbúl í dag þar sem lögregla lét til skarar skríða gegn hópi fólks sem hafði komið saman í Okmeydani hverfinu. Fólkið safnaðist saman til stuðnings við Berkin Elvan, fjórtán ára pilt sem er enn í dái á sjúkrahúsi eftir að hafa fengið táragashylki frá lögreglu í höfuðið á meðan mótmælunum vegna fyrirhugaðra framkvæmda við Gezi-garð stóð í júní. Frá þessu segir á fréttavefnum Hurryet, en ekkert kemur þar fram um hvort nokkur hafi slasast í átökunum.

Fólkið hugðist ganga að dómshúsinu í Istanbúl og krefjast þess að lögreglumaðurinn sem slasaði Elvan verði látinn svara til saka. Drengurinn var ekki þáttakandi í mótmælunum, heldur var á leið út í búð þegar hann fékk hylkið í höfuðið.

Lögregla tilkynnti fólkinu að samkundan í dag væri á skjön við lög og skaut svo táragasi á hópinn eftir að nokkrir grímuklæddir menn hófu að henda grjótum og bensínsprengjum að lögreglu.

Nokkuð hefur hægt um frá því að rósturnar brutust út í Tyrklandi í maí. Mikill fjöldi fólks þusti þá út á götur landsins til að mótmæla ofríki Erdogans forsætisráðherra, eftir að lögregla hafði gengið harkalega fram gegn mótmælendum sem standa gegn eyðileggingu Gezi-almenningsgarðsins.

Síðan þá hafa þó stöku sinnum blossað upp átök, en fimm manns hafa látist frá því að átökin byrjuðu og þúsundir hafa slasast.