Rússar hvetja Sýrlendinga til að láta efnavopn af hendi

Sergei Lavrov utanríkisráðherra Rússlands sagði á blaðamannafundi í Mosvku í dag að Rússar hyggðust hvetja Sýrland til þess að færa efnavopnabirgðir sínar undir stjórn alþjóðasamfélagsins, ef að það yrði til þess að koma í veg fyrir hernaðaríhlutun vesturveldanna.

Lavrov lýsti þessu yfir í dag eftir fund með sýrlenskum starfsbróður sínum Walid al-Moallem, og bætti því við að hann teldi að eftirlitsteymi Sameinuðu þjóðanna, sem rannsakaði hvort efnavopnum hafi verið beitt í borgarastríðinu í Sýrlandi, ættu að snúa aftur til Sýrlands og ljúka rannsókninni og kynna niðustöður sínar fyrir Öryggisráði Sameinuðu þjóðanna. 

Moallem tók í sama streng og sagði stjórnvöld í Sýrlandi reiðubúin til að taka á móti teyminu á ný og staðhæfði að þeir myndu láta einskis ófreistað til að sanna fyrir Bandaríkjunum að þeir hafi ekki átt hlut að máli þegar efnavopnum var beitt gegn almennum borgurum í úthverfi Damaskus fyrir um nokkrum vikum síðan.

Hvorki Lavrov né Moallem gátu stutt þá kenningu sína að uppreisnarhópar í Sýrlandi hafi staðið á bak við árásina.

Fyrr í dag lét John Kerry, utanríkisráðherra Bandaríkjanna, þau orð falla, eftir fund með William Hague, utanríkisráðherra Breta, að hann hefði sannanir fyrir því að ábyrgðin á árásunum væri hjá Assad forseta og hans nánustu samstarfsmönnum. 

Hann þrýstir nú fast á að önnur ríki styðji Bandaríkin í aðgerðum gegn Sýrlandsstjórn. Hann gat þess þó að ef Sýrland myndi láta öll efnavopn sín af hendi, mundu Bandaríkin endurskoða áætlanir um árásir.