Rifist um byssuleyfi blindra í Iowa

Iowa-fylki Bandaríkjanna gefur út byssuleyfi til blindra og sjónskertra og mega þeir bæði eiga skotvopn og ganga með þau á sér.

Byssuleyfin eru til umræðu þessa dagana og telja margir að þau vegi að öryggi almennings. Þá eru talsmenn fatlaðra og löggæslumenn í fylkinu klofnir í afstöðu sinni. Telja sumir að um grundvallarmannréttindi sé að ræða og að neita blindum um byssuleyfi væri mismunun.

„Þegar maður hleypir af byssu þarf að miða og skjóta. Ég tel ekki að sjón sé endilega nauðsynleg,“ segir Michael Barber í borginni Altoona, en hann er blindur. Hann nýtur aðstoðar eiginkonu sinnar við meðhöndlun byssunnar, en þau hyggjast æfa sig á skotæfingasvæði og hafa bæði staðist öryggispróf. Í meðfylgjandi myndbandi má sjá Barber kaupa byssu ásamt eiginkonu sinni.

Í ítarlegri umfjöllun Des Moines Register er meðal annars vitnað í tónlistarmanninn Stevie Wonder sem hefur lýst yfir áhyggjum sínum af skotvopnalöggjöfinni í Bandaríkjunum. „Ímyndið ykkur mig með byssu,“ sagði Wonder í samtali við CNN. „Þetta er algjört brjálæði.“