Nóbelsverðlaunahafinn Seamus Heaney látinn

Nóbelsverðlaunahafinn og rithöfundurinn Seamus Heaney er látinn. Hann lést eftir skamma sjúkralegu á sjúkrahúsi Í Dublin á Írlandi. Samkvæmt frétt The Guardian tilkynnti talsmaður Heaney um þetta í morgun.

Heaney fékk bókmenntaverðlaun Nóbels árið 1995 og var hann fyrsti Írinn til þess að hljóta þau verðlaun síðan W.B. Yeats fékk Nóbelinn árið 1923. Hann hlaut jafnframt T.S. Eliot verðlaunin árið 2006 fyrir ljóðabókina sína „District and Circle“. Í þeirri bók var ljóð sem heitir Höfn og hann samdi þegar hann dvaldi á Höfn í Hornafirði.

Sigurbjörg Þrastardóttir rithöfundur hitti Heaney á ljóðahátíð í Rotterdam árið 2005, þar sem hann las meðal annars ljóðið Höfn.

„Það var virkilega gaman að hann skyldi einmitt lesa þetta ljóð upp á hátíðinni, þar sem hann hafði úr fjölda annarra ljóða að velja. Ég talaði stuttlega við hann eftir lesturinn og hann var rólegur og kátur í viðkynningu,“ segir Sigurbjörg.

„Hann hafði átt í talsverðum vandræðum með að bera fram orðið Höfn í fyrstu en hafði náð góðum tökum á því þegar ég hitti hann.“

Heaney kom hingað til lands árið 2004 og flutti ljóð sín á listahátíð ásamt olnbogapípuleikaranum Liam Flynn. Hann ferðaðist meðal annars til Akureyrar og til Hafnar í Hornafirði þar sem hann samdi umrætt ljóð.

Höfn

The three-tongued glacier has begun to melt.

What will we do, they ask, when boulder-milt

Comes wallowing across the delta flats

And the miles-deep shag ice makes its move?

I saw it, ridged and rock-set, from above,

Undead grey-gristed earth-pelt, aeon-scruff,

And feared its coldness that still seemed enough

To iceblock the plane window dimmed with breath,

Deepfreeze the seep of adamantine tilth

And every warm, mouthwatering word of mouth.