Sakfelldur fyrir morð á ársgömlu barni

Hinn 18 ára gamli De'Marquise Elkins var í gær sakfelldur fyrir morð á ársgömlu barni í borginni Brunswick í Georgíufylki Bandaríkjanna í mars. Hann á yfir höfði sér lífstíðarfangelsi fyrir morðið.

Þann 21. mars var Sherry West, móðir hins 13 mánaða gamla Antonio Santiago, á göngu frá pósthúsi í borginni þegar Elkins, vopnaður skammbyssu, heimtaði að hún afhenti sér handtösku sína. Þegar hún sagðist ekki vera með peninga á sér skaut Elkins viðvörunarskoti upp í loftið og skaut síðan West í fótlegginn og son hennar í höfuðið þar sem hann sat í kerru sinni. Hann lést samstundis.

Dominique Lang, 15 ára stúlka sem var með Elkins þegar hann framdi morðið, hefur einnig verið ákærð vegna málsins en réttarhöld yfir henni eru ekki hafin. Þá var réttað yfir móður Elkins vegna gruns um aðild að málinu og var hún fundin sek um að spilla sönnunargögnum en sýknum af ákærum um að ljúga að lögreglunni. Þá hefur systir Elkins einnig verið ákærð fyrir að eiga við sönnunargögn.