Rannsókn lokið á efnavopnaárás

Rannsóknarteymi á vegum Sameinuðu þjóðanna sem kannaði staðhæfingar þess efnis að sýrlensk stjórnvöld hefðu beitt efnavopnum gegn eigin borgurum í úthverfi Damaskus hinn 21. ágúst hefur lokið störfum.

Teymið fór yfir landamærin til Líbanon um það leyti sem Barack Obama, forseti Bandaríkjanna, lýsti því yfir að bandarísk stjórnvöld væri að íhuga að grípa til aðgerða gegn sýrlenskum stjórnvöldum.

Rannsóknarteymið var í Sýrlandi í fjóra daga og á skýrsla þess að liggja fyrir innan nokkurra vikna, að sögn Ban Ki Moon aðalritara Sameinuðu þjóðanna.

Frá þessu er greint á fréttavef BBC. John Kerry, utanríkisráðherra Bandaríkjanna, fullyrti að 1429 óbreyttir borgarar, þar af 426 börn, hefðu beðið bana í efnavopnaárásinni í Damaskus en staðhæfingarnar voru byggðar á skýrslu bandarískra stórnvalda.

Óvíst er hvort Bandaríkjamenn grípi til aðgerða, en Barack Obama hefur útilokað hernaðaraðgerðir á jörðu niðri.