Búast við holskeflu flóttamanna frá Sýrlandi

Mannúðarsamtök sem starfa á landamærum Sýrland búast við holskeflu flóttamanna frá landinu á næstu dögum og vikum.

Ótti almennings í Sýrlandi við loftárásir fer vaxandi en fram kemur í tilkynningu frá Barnaheilllum að þúsundir Sýrlendinga reyni daglega að komast yfir landamærin til Jórdaníu og Líbanon.

Enn er óvíst hvort Bandaríkjamenn láti til skarar skríða, en Obama Bandaríkjaforseti hefur útilokað aðgerðir á jörðu niðri.

Er fremur búist við snörpum loftárásum á hernaðarlega mikilvæg skotmörk.

Öruggt er að Bretar munu ekki taka þátt í hugsanlegum aðgerðum í Sýrlandi því breska þingið felldi tillögu David Camerons forsætisráðherra þess efnis í fyrrakvöld.