Leki í ónýta kjarnorkuverinu

Leki er kominn að geymi í kjarnorkuverinu í Fukushima í Japan sem varð illa úti í jarðskjálfta og flóðbylgju sem á eftir kom árið 2011.

Úr geyminum streymir nú mjög geislavirkt vatn og er talið að um þrjúhundruð tonn hafi þegar sloppið út. Það var starfsmaður orkuversins sem uppgötvaði lekann í gær að því er segir í yfirlýsingu frá fyrirtækinu sem rekur verið. Gefin hefur verið út viðvörun vegna atviksins, sem er þó ekki talið mjög alvarlegt, en það er fyrsta sinn sem slíkt er gert í Fukushima eftir óhappið 2011, þrátt fyrir að oft hafi borist fregnir af menguðu vatni á svæðinu.