Verða sektaðir fyrir að pissa útfyrir

Karlmenn í Shenzen-héraði í Kína þurfa aldeilis að fara að vanda sig á almenningssalernum, en nýjar reglur sem taka gildi í næasta mánuði heimila embættismönnum að sekta þá sem pissa út fyrir um sem nemur tæpum 2.000 íslenskum krónum. BBC segir frá þessu á vef sínum.

Yfirlýstur tilgangur með þessum nýju reglum er að stemma stigum við „dólgslegu framferði á almenningssalernum". Þó er ekki tekið beint fram hversu mikið magn þurfi að fara útfyrir til að brot megi teljast.

Reglurnar hafa mætt háði og gagnrýni, meðal annars á samfélagsmiðlinum Weibo, en gagnrýnendur eiga erfitt með að sjá hvernig megi fylgja þessum reglum eftir nema eftirlitsmenn standi vaktina á hverju almenningssalerni.

Þá er í aðsendri grein í Beijing Times sett spuringarmerki við hvort nauðsynlegt sé að setja formleg lög um nokkuð sem ætti einfaldlega að fylgja óskrifuðum reglum samfélagsins.